ताज्या घडामोडी

गारगोटीत आरोग्यसेवेच्या क्षेत्रात नवे पर्व! ३० खाटांचे अत्याधुनिक नेत्र रुग्णालय आणि सुसज्ज कॅथलॅब नागरिकांच्या सेवेत; भुदरगडच्या आरोग्य सुविधांना ना. आबिटकर यांच्या प्रयत्नतून मिळणार मोठे बळ!

गारगोटीत आरोग्यसेवेच्या क्षेत्रात नवे पर्व!

३० खाटांचे अत्याधुनिक नेत्र रुग्णालय आणि सुसज्ज कॅथलॅब नागरिकांच्या सेवेत;

भुदरगडच्या आरोग्य सुविधांना ना. आबिटकर यांच्या प्रयत्नतून मिळणार मोठे बळ!

सिंहवाणी ब्युरो | गारगोटी
गारगोटी आणि भुदरगड तालुक्याच्या आरोग्यसेवेच्या दृष्टीने एक महत्त्वपूर्ण पाऊल पडत असून, गारगोटी येथील उपजिल्हा रुग्णालयात ३० खाटांचे अत्याधुनिक नेत्र रुग्णालय तसेच हृदयविकाराच्या रुग्णांसाठी सुसज्ज कॅथलॅब सुरू होणार आहे. आधुनिक वैद्यकीय उपकरणे, तज्ज्ञ उपचार सुविधा आणि विविध तपासण्यांची उपलब्धता यामुळे आता डोळ्यांचे आजार आणि हृदयविकारावरील उपचारांसाठी रुग्णांना मोठ्या शहरांकडे धाव घेण्याची गरज कमी होणार आहे.

या दोन्ही सुविधांच्या लोकार्पण आणि शुभारंभाचा कार्यक्रम रविवार, दि. २२ नोव्हेंबर २०२६ रोजी सकाळी १० वाजता उपजिल्हा रुग्णालय, गारगोटी येथे आयोजित करण्यात आला आहे. सार्वजनिक आरोग्य व कुटुंबकल्याण मंत्री तथा पालकमंत्री, कोल्हापूर प्रकाश आबिटकर यांच्या उपस्थितीत हा कार्यक्रम होणार असल्याची माहिती देण्यात आली आहे.
डोळ्यांच्या आजारांवर एकाच छताखाली आधुनिक उपचार

नव्याने सुरू होणाऱ्या ३० खाटांच्या नेत्र रुग्णालयात डोळ्यांच्या विविध आजारांवर आधुनिक पद्धतीने तपासणी व उपचार करण्याची सुविधा उपलब्ध होणार आहे. यामध्ये प्रामुख्याने :

* मोतीबिंदू तपासणी व शस्त्रक्रिया.

* डोळ्यांना स्पर्श न करता आधुनिक IOL मास्टरद्वारे लेन्सचा अचूक नंबर मोजणे.

* शस्त्रक्रियेनंतर येणारी जाळी काढण्यासाठी YAG लेझर सुविधा.

* चष्म्याचा अचूक नंबर तपासणी.

* लहान मुलांच्या डोळ्यांच्या आजारांची तपासणी व उपचार.

* काचबिंदू तपासणी व उपचार.

* परिमिती (Perimetry) चाचणी.

* OCT स्कॅनद्वारे रेटिना व डोळ्याच्या मागील पडद्याची तपासणी.

* टेरिजियम शस्त्रक्रिया (डोळ्यावरील अतिरिक्त मांसल पडदा काढणे).

* नासूर तपासणी व शस्त्रक्रिया.

* डोळ्यांचा दाब तपासणी.

अशा विविध सुविधा उपलब्ध होणार असल्याने ग्रामीण भागातील नेत्ररुग्णांना मोठा दिलासा मिळणार आहे.

हृदयविकाराच्या रुग्णांसाठी कॅथलॅबची सुविधा

हृदयविकाराच्या रुग्णांसाठी कॅथलॅब ही अत्यंत महत्त्वाची वैद्यकीय सुविधा आहे. गारगोटी उपजिल्हा रुग्णालयात सुसज्ज कॅथलॅब उपलब्ध होणार असून, यासाठी ९ कोटी रुपयांचा निधी मंजूर झाल्याचे जाहिरात पत्रकात नमूद आहे.

या कॅथलॅबमध्ये पुढील सुविधा उपलब्ध होणार आहेत.

* अँजिओग्राफी : हृदयाच्या रक्तवाहिन्यांमधील अडथळे तपासण्याची प्रक्रिया.

* अँजिओप्लास्टी : अरुंद झालेल्या रक्तवाहिन्यांमधील अडथळे दूर करण्याची प्रक्रिया.

* ASD Repair : हृदयाच्या वरच्या दोन कप्प्यांमधील भिंतीतील छिद्र बंद करण्याची शस्त्रक्रिया.

* VSD Repair : हृदयाच्या खालच्या दोन कप्प्यांमधील भिंतीतील छिद्र बंद करण्याची शस्त्रक्रिया.

याशिवाय १० आयसीयू युनिटसह आपत्कालीन उपचारांसाठी आवश्यक उपकरणे आणि मॉड्युलर ऑपरेशन थिएटरची सुविधाही या कॅथलॅबच्या माहितीपत्रकात दर्शविण्यात आली आहे.

ग्रामीण आरोग्यसेवेसाठी महत्त्वपूर्ण पाऊल

आजही ग्रामीण भागातील अनेक रुग्णांना डोळ्यांच्या गंभीर आजारांवरील उपचार, हृदयविकाराच्या तपासण्या आणि शस्त्रक्रियांसाठी कोल्हापूर, सांगली, पुणे किंवा अन्य मोठ्या शहरांमध्ये जावे लागते. त्यासाठी आर्थिक खर्च, प्रवासाचा त्रास आणि वेळेचा अपव्यय सहन करावा लागतो.

गारगोटी येथे या आधुनिक सुविधा उपलब्ध झाल्यास भुदरगडसह परिसरातील ग्रामीण रुग्णांना स्थानिक पातळीवरच प्रगत आरोग्यसेवेचा लाभ घेता येणार आहे. विशेषतः हृदयविकाराच्या रुग्णांसाठी वेळेत निदान आणि उपचार मिळण्याच्या दृष्टीने कॅथलॅब महत्त्वपूर्ण ठरू शकते.

मात्र या सुविधांचा खरा लाभ सामान्य आणि आर्थिकदृष्ट्या दुर्बल रुग्णांपर्यंत पोहोचण्यासाठी उपचारांचा खर्च, मोफत व सवलतीच्या योजनांची अंमलबजावणी, तज्ज्ञ डॉक्टरांची उपलब्धता आणि उपकरणांची नियमित कार्यक्षमता यांनाही तितकेच महत्त्व राहणार आहे.

गारगोटीच्या आरोग्यसेवेच्या इतिहासात हा महत्त्वाचा टप्पा ठरण्याची अपेक्षा आहे. ना प्रकाश आबिटकर यांच्या प्रयत्नातून आधुनिक आरोग्य सुविधा सर्वसामान्यांच्या आवाक्यात आल्या आहेत

✍️ संपादक : किशोर आबिटकर सिंहवाणी लाईव्ह न्यूज निर्भीड • निष्पक्ष • विश्वासार्ह पत्रकारिता!

Leave a Reply

Your email address will not be published. Required fields are marked *

Back to top button