अथणी शुगर्सच्या भुदरगड युनिटचा ११वा बॉयलर अग्निप्रदीपन सोहळा उत्साहात

शेतकरी समाधानी तर कारखाना समाधानी हेच आमचे ब्रीद — एम.डी. श्रीनिवास पाटील

सिंहवाणी ब्युरो / तांबाळे (भुदरगड) :
येथील शेतकऱ्यांच्या जिव्हाळ्याचा विषय असलेल्या अथणी शुगर्स लि. भुदरगड युनिटच्या ११व्या गळीत हंगामाच्या बॉयलर अग्निप्रदीपन सोहळ्याला गुरुवारी (दि. २४ सप्टेंबर) उत्साहपूर्ण आणि मंगलमय वातावरणात सुरुवात झाली. सकाळी १०.१५ वाजता कारखान्याचे व्यवस्थापकीय संचालक श्रीनिवास पाटील यांच्या शुभहस्ते बॉयलरचे विधिवत अग्निप्रदीपन करण्यात आले.

यावेळी मंत्रोच्चार, दीपप्रज्वलन, आरती तसेच बॉयलरचे पूजन करण्यात आले. आगामी गळीत हंगामाच्या पार्श्वभूमीवर कारखाना प्रशासनाने तयारीला वेग दिला असून, लवकरच प्रत्यक्ष ऊस गाळपाला सुरुवात होणार असल्याची माहिती देण्यात आली.

वेळेत गाळप, वेळेत बिल देण्यावर भर

यावेळी बोलताना एम.डी. श्रीनिवास पाटील म्हणाले, “गेली दहा वर्षे शेतकरी बांधवांनी अथणी शुगर्सवर जो विश्वास दाखविला आहे, तोच आमचे खरे भांडवल आहे. ११व्या हंगामात ऊसाचे वेळेवर गाळप, वेळेवर ऊसबिल आणि वाहतूक व्यवस्थेत अधिक सुसूत्रता आणण्यावर आमचा भर राहील. शेतकरी समाधानी तर कारखाना समाधानी, हेच आमचे ब्रीद आहे.”

यंदा पावसाचे प्रमाण चांगले झाल्याने परिसरातील ऊस क्षेत्रात वाढ झाली आहे. त्यामुळे आगामी गळीत हंगाम विक्रमी करण्याचा मानसही पाटील यांनी व्यक्त केला. ऊस उत्पादक शेतकऱ्यांना वेळेत गाळपाची सुविधा मिळावी, तसेच वाहतूक व्यवस्थेत कोणतीही अडचण निर्माण होऊ नये, यासाठी नियोजन करण्यात येत असल्याचे त्यांनी सांगितले.

११व्या हंगामाकडे शेतकऱ्यांचे लक्ष

अथणी शुगर्सच्या भुदरगड युनिटचा गळीत हंगाम हा परिसरातील ऊस उत्पादक शेतकऱ्यांसाठी महत्त्वाचा मानला जातो. बॉयलर अग्निप्रदीपनामुळे आगामी हंगामाच्या प्रत्यक्ष तयारीला सुरुवात झाली असून, कारखाना परिसरातील यंत्रसामग्री आणि विविध विभागांमध्ये कामांना गती येणार आहे.

या सोहळ्यास चीफ इंजिनीअर नामदेव भोसले, चीफ केमिस्ट प्रकाश हेदुरे, चीफ अकाउंटंट जमीर मकानदार, विविध विभागांचे प्रमुख, अधिकारी, कर्मचारी, वाहतूक ठेकेदार तसेच पंचक्रोशीतील मोठ्या संख्येने ऊस उत्पादक शेतकरी उपस्थित होते.

कार्यक्रमाचे प्रास्ताविक शेती अधिकारी राजाराम आमते यांनी केले. सूत्रसंचालन व आभार बाबासाहेब देसाई यांनी मानले.

— सिंहवाणी लाईव्ह न्यूज
संपादक : किशोर आबिटकर