एक दिवा व्यसनमुक्तीचा! हिंगोली जिल्ह्यात जनजागृतीचा प्रकाश; सामाजिक कार्यकर्त्यांचा स्तुत्य पुढाकार

दिवाळीच्या उत्साहात व्यसनमुक्तीचा संदेश; ७ ते ११ नोव्हेंबरदरम्यान विविध ठिकाणी प्रबोधनपर उपक्रम

सिंहवाणी ब्युरो | हिंगोली
दिवाळी म्हणजे आनंद, उत्साह आणि प्रकाशाचा सण! मात्र, या प्रकाशोत्सवाला सामाजिक परिवर्तनाची जोड देत हिंगोली जिल्ह्यात सामाजिक कार्यकर्त्यांनी एक अनोखा उपक्रम राबविला. दिवाळीच्या निमित्ताने ७ ते ११ नोव्हेंबरदरम्यान **‘एक दिवा व्यसनमुक्तीचा’** या अभिनव अभियानातून जिल्हाभर व्यसनमुक्तीचा जागर करण्यात आला.

केंद्र शासनाच्या सामाजिक न्याय व अधिकारिता मंत्रालय पुरस्कृत ‘नशामुक्त भारत अभियान’ अंतर्गत नशामुक्त भारत अभियान समिती, नशाबंदी मंडळ महाराष्ट्र राज्य, गंगाप्रसादजी अग्रवाल सर्वोदय कार्यालय, वसमत आणि महाराष्ट्र सर्वोदय मंडळ यांच्या संयुक्त विद्यमाने हा जनजागृती उपक्रम राबविण्यात आला.

प्रबोधनपर पत्रके आणि चित्रप्रदर्शनातून जनजागृती

‘नशामुक्त भारत… व्यसनमुक्त महाराष्ट्र… सक्षम महाराष्ट्र’ घडविण्याचा संकल्प घेऊन जिल्ह्यात विविध ठिकाणी व्यसनमुक्तीपर प्रबोधनात्मक पत्रकांचे वितरण करण्यात आले. तसेच नशाबंदी मंडळाने प्रकाशित केलेल्या व्यसनमुक्ती चित्रप्रदर्शनाच्या माध्यमातून नागरिकांमध्ये व्यसनांचे दुष्परिणाम आणि व्यसनमुक्त जीवनाचे महत्त्व पटवून देण्यात आले.

‘एक विचार नशामुक्तीचा, एक दिवा व्यसनमुक्तीचा’ हा संदेश घेऊन राबविण्यात आलेल्या या उपक्रमाला सामाजिक कार्यकर्त्यांनी उत्स्फूर्त प्रतिसाद दिला.

**एका दिवसापासून व्यसनमुक्तीची सुरुवात करा!**

व्यसनमुक्ती ही एका दिवसात साध्य होणारी प्रक्रिया नसली, तरी तिची सुरुवात एका दिवसाच्या निर्धारातून होऊ शकते. ‘फक्त आजचा दिवस व्यसनांपासून लांब राहा… एका-एका दिवसाच्या बेरजेतून पूर्णतः व्यसनमुक्तीकडे वाटचाल करा,’ असे प्रेरणादायी आवाहन नशामुक्त भारत अभियान समितीचे जिल्हा पदाधिकारी विशाल अग्रवाल यांनी केले.

या जनजागृती अभियानात विशाल अग्रवाल, शुभदा सरोदे, आबा पांचाळ, हनुमंत देशपांडे, मिलिंद आळणे, सुभाष कुंभारकर, विठ्ठल सादुलवार, मृण्मयी अग्रवाल आदी सामाजिक कार्यकर्त्यांनी विशेष परिश्रम घेतले.

**मान्यवरांकडून उपक्रमाचे कौतुक**

नशामुक्त भारत अभियान समितीचे जिल्हाध्यक्ष तथा जिल्हाधिकारी राहुल गुप्ता, समाजकल्याण सहायक आयुक्त तथा जिल्हा परिषद प्रभारी जिल्हा समाजकल्याण अधिकारी गीता गुट्टे, माजी व्यसनमुक्ती राज्यमंत्री जयप्रकाश दांडेगावकर, ज्येष्ठ सामाजिक कार्यकर्त्या तथा शिक्षणतज्ज्ञ शांताताई भाले, साहित्यिक अशोक अर्धापूरकर आणि पत्रकार तुकाराम झाडे यांनी या उपक्रमाचे कौतुक केले.

दिवाळीच्या दीपोत्सवात केवळ घराघरांत दिवे लावण्याऐवजी समाजातील व्यसनरूपी अंधार दूर करण्याचा संदेश देणारा हा उपक्रम निश्चितच प्रेरणादायी ठरला आहे. व्यसनमुक्त कुटुंब, व्यसनमुक्त समाज आणि सक्षम महाराष्ट्राच्या निर्मितीसाठी अशा जनजागृती अभियानांची गरज अधोरेखित झाली आहे.

✍️ **संपादक : किशोर आबिटकर**