पेपरफुटीचा दणका :

NEET नंतर आता TET परीक्षेत पेपरफुटीचा प्रकार; उद्याची परीक्षा पुढे ढकलली,

लाखो उमेदवारांना मोठा धक्का

सिंहवाणी ब्युरो, पुणे :
देशपातळीवर वैद्यकीय प्रवेशासाठीची ‘aनीट’ (NEET) परीक्षा आणि त्यानंतर उद्भवलेला पेपरफुटीचा वाद ताजा असतानाच, आताa महाराष्ट्रातही एक खळबळजनक प्रकार समोर आला आहे. राज्यात रविवारी, २८ जून रोजी आयोजित करण्यात आलेली शिक्षक पात्रता परीक्षा (TET) पेपरफुटीच्या संशयावरून तडकाफडकी पुढे ढकलण्यात आली आहे. भिवंडी येथे परीक्षेचा पेपर फुटल्याचे उघडकीस आल्यानंतर महाराष्ट्र राज्य परीक्षा परिषदेने अत्यंत तातडीने हा निर्णय घेतला असून, यामुळे राज्यातील लाखो उमेदवारांना मोठा धक्का बसला आहे.
​महाराष्ट्र राज्य परीक्षा परिषदेच्या वतीने रविवार, २८ जून २०२६ रोजी संपूर्ण राज्यातील १,०२८ केंद्रांवर ही शिक्षक पात्रता परीक्षा (TET) घेतली जाणार होती. नुकत्याच झालेल्या नीट परीक्षेतील गैरप्रकार लक्षात घेऊन या परीक्षेसाठी राज्य परीक्षा परिषदेने अत्यंत कडक आणि सुरक्षिततेच्या सर्व उपाययोजना केल्याचा दावा केला होता. मात्र, परीक्षा सुरू होण्याच्या अवघ्या काही तास आधीच या संपूर्ण व्यवस्थेला खिंडार पडल्याचे समोर आले आहे.
​शनिवारी, २७ जून रोजी पहाटेच्या सुमारास भिवंडी पोलिसांना गोपनीय माहिती मिळाली होती की, भिवंडी येथील काही इसमांकडे या TET परीक्षेच्या प्रश्नपत्रिकेबद्दलची अत्यंत गोपनीय माहिती आणि साहित्य उपलब्ध आहे. या माहितीच्या आधारे भिवंडी पोलिसांनी संबंधित ठिकाणी अत्यंत गुप्तपणे धाड टाकली. पोलिसांनी संशयितांना ताब्यात घेतल्यानंतर या प्रकरणाचे गांभीर्य ओळखून महाराष्ट्र राज्य परीक्षा परिषदेच्या वरिष्ठ अधिकाऱ्यांना तातडीने पडताळणीसाठी पाचारण केले.
​परीक्षा परिषदेच्या अधिकाऱ्यांनी भिवंडी येथे पोहोचून जप्त केलेल्या साहित्याची आणि मूळ प्रश्नपत्रिकेची बारकाईने पडताळणी केली. या तपासणीत धक्कादायक बाब समोर आली की, संशयित इसमांकडे सापडलेले काही प्रश्न हे रविवारी होणाऱ्या प्रत्यक्ष TET परीक्षेच्या प्रश्नपत्रिकेतील प्रश्नांशी तंतोतंत जुळणारे होते. प्रश्नपत्रिकेतील गोपनीयता भंग झाल्याचे स्पष्ट होताच भिवंडी पोलीस ठाण्यात याप्रकरणी गुन्हा दाखल करण्यात आला असून पोलिसांनी पुढील तपास चक्राकार गतीने सुरू केला आहे.
​या संपूर्ण गंभीर परिस्थितीची दखल घेत महाराष्ट्र राज्य परीक्षा परिषदेने रविवारी होणारी परीक्षा तात्काळ स्थगित करण्याचा निर्णय घेतला. कोणत्याही परिस्थितीत परीक्षा पूर्ण पारदर्शकतेने आणि पवित्रतेनेच पार पडली पाहिजे, असा परीक्षा परिषदेचा आग्रह आहे. या प्रकरणाची सखोल आणि सविस्तर चौकशी होणे अत्यंत गरजेचे असल्यानेच २८ जूनची परीक्षा पुढे ढकलण्यात येत असल्याचे परीक्षा परिषदेच्या आयुक्तांनी जाहीर केले आहे. या परीक्षेबाबतची पुढील तारीख आणि अद्ययावत माहिती परिषदेच्या अधिकृत संकेतस्थळावर प्रसिद्ध केली जाईल, असे स्पष्ट करण्यात आले असून उमेदवारांनी अधिकृत माहितीवरच विश्वास ठेवावा, असे आवाहन प्रशासनाने केले आहे

टीईटी पेपरफुटीच्या संदर्भाने भिवंडी पोलिसांनी पत्रकार परिषद घेऊन काही धक्कादायक खुलासे केले आहेत. एका पेपरची किंमत तब्बल दीड कोटी रुपये ठरली होती, असे भिवंडीचे अतिरिक्त पोलीस आयुक्त अशोक दुधे यांनी सांगितले. तसेच पेपरफुटीचा तपास करण्यासाठी विशेष पोलीस पथकाची स्थापना केली असून एसीपींच्या नेतृत्वाखाली ८ पोलीस निरीक्षक आणि इतर कर्मचारी काम करून पेपरफुटीचा तपास करतील, अशी माहिती अतिरिक्त पोलीस आयुक्त अशोक दुधे यांनी दिली.