नीट पेपरफुटी प्रकरणात शिवराज मोटेगावकरसह १३ जणांविरोधात CBIचे आरोपपत्र; 

आज न्यायालयात सुनावणी

नवी दिल्ली / सिंहवाणी ब्युरो :

  देशभरात प्रचंड खळबळ उडालेल्या NEET-UG पेपरफुटी प्रकरणात केंद्रीय अन्वेषण विभागाने (CBI) तपासाला वेग देत मोठी कारवाई केली आहे. या प्रकरणात शिवराज मोटेगावकर यांच्यासह १३ आरोपींविरोधात दिल्लीतील राऊस एव्हेन्यू विशेष न्यायालयात आरोपपत्र दाखल करण्यात आले असून बुधवारी (२९ जुलै) या प्रकरणाची सुनावणी होणार आहे. पेपरफुटीशी संबंधित गुन्ह्यांच्या जलद निपटाऱ्यासाठी स्थापन करण्यात आलेल्या फास्ट-ट्रॅक न्यायालयात या खटल्याची सुनावणी होणार असल्याने देशभरातील विद्यार्थी, पालक आणि शिक्षण क्षेत्राचे लक्ष या सुनावणीकडे लागले आहे.
सीबीआयच्या आर्थिक गुन्हे शाखेने दाखल केलेल्या आरोपपत्रात नवीन भारतीय न्याय संहिता (BNS) २०२३ मधील विविध कलमांसह भ्रष्टाचार प्रतिबंधक कायदा १९८८ तसेच सार्वजनिक परीक्षा (अनुचित प्रकारास प्रतिबंध) कायद्याअंतर्गत गंभीर आरोप ठेवण्यात आले आहेत. तपासादरम्यान डिजिटल पुरावे, मोबाईल संदेश, आर्थिक व्यवहारांची माहिती आणि विविध राज्यांतील संशयितांमधील संपर्कांचे पुरावे गोळा करण्यात आल्याचे समोर आले आहे.
आरोपपत्रात यश यादव, मांगीलाल बिवाल, दिनेश बिवाल, विकास बिवाल, शुभम खैरनार, धनंजय लोखंडे, प्रल्हाद कुलकर्णी, तेजस हर्षद कुमार, डॉ. मनोज शिरूरे, शिवराज मोटेगावकर, मनीषा वाघमारे, मनीषा मांढरे आणि मनीषा संजय या १३ आरोपींचा समावेश आहे. सध्या सर्व आरोपी न्यायालयीन कोठडीत असून पुढील सुनावणीदरम्यान न्यायालय त्यांच्यावरील आरोपांची दखल घेणार आहे.
देशभरात संतापाची लाट
NEET-UG परीक्षेतील कथित गैरव्यवहार आणि पेपरफुटीच्या आरोपांमुळे लाखो विद्यार्थ्यांच्या भवितव्याचा प्रश्न निर्माण झाला होता. निकाल प्रक्रियेतील अनियमितता, गुणांतील संशयास्पद वाढ आणि पेपर लीकच्या आरोपांमुळे विद्यार्थी व पालकांमध्ये तीव्र नाराजी निर्माण झाली होती. या प्रकरणाचे पडसाद देशभर उमटले आणि अनेक राज्यांमध्ये आंदोलनांची मालिका सुरू झाली.
या मुद्द्यावर ‘कॉकरोच जनता पार्टी’ने (CJP) तब्बल ३६ दिवस आंदोलन छेडले होते. वाढत्या राजकीय दबावानंतर २५ जुलै रोजी केंद्रीय शिक्षणमंत्री धर्मेंद्र प्रधान यांनी आपल्या पदाचा राजीनामा दिल्याने या प्रकरणाला आणखी मोठे राजकीय स्वरूप प्राप्त झाले.
तपास अजूनही सुरूच
सीबीआयने देशातील विविध राज्यांमध्ये छापे टाकून अनेक इलेक्ट्रॉनिक उपकरणे जप्त केली असून आर्थिक व्यवहारांची साखळीही तपासली जात आहे. प्रश्नपत्रिका लीक करणारे, मध्यस्थ, परीक्षार्थ्यांना मदत करणारे आणि आर्थिक व्यवहारांमध्ये सहभागी असलेल्या सर्व संबंधितांची चौकशी सुरू असल्याचे सूत्रांनी सांगितले. त्यामुळे आगामी काळात आणखी काही आरोपींविरोधात पूरक आरोपपत्र दाखल होण्याची शक्यता नाकारता येत नाही.
आजच्या सुनावणीकडे देशाचे लक्ष
फास्ट-ट्रॅक न्यायालयात होणाऱ्या आजच्या सुनावणीत आरोपपत्राची दखल घेतली जाणार असून पुढील न्यायालयीन प्रक्रियेची दिशा निश्चित होणार आहे. लाखो विद्यार्थ्यांच्या भवितव्याशी संबंधित असलेल्या या प्रकरणात न्यायालयाचा पुढील निर्णय अत्यंत महत्त्वाचा मानला जात आहे.