गारगोटी हायस्कूलमध्ये झिम्मा-फुगडी व गौरी गीतांचा रंगला पारंपरिक उत्सव:

पारंपरिक वेशभूषेतील विद्यार्थिनींच्या उत्स्फूर्त सहभागाने विद्यालयाचा परिसर झाला चैतन्यमय

गारगोटी / सिंहवाणी ब्युरो :
भुदरगड शिक्षण संस्था संचलित गारगोटी हायस्कूल व श्री. समर्थ कनिष्ठ महाविद्यालयात गणेश चतुर्थीच्या मंगलमय पर्वानिमित्त झिम्मा-फुगडी आणि पारंपरिक गौरी गीतांचा उत्सव उत्साहात पार पडला. पारंपरिक वेशभूषेत सहभागी झालेल्या विद्यार्थिनींच्या उत्स्फूर्त सहभागामुळे विद्यालयाच्या परिसरात मराठी संस्कृतीचा आणि लोकपरंपरेचा मनोहारी आविष्कार अनुभवायला मिळाला.

महाराष्ट्राच्या समृद्ध लोककला, परंपरा आणि सांस्कृतिक वारशाचे जतन व्हावे तसेच नव्या पिढीला आपल्या लोकपरंपरांची ओळख व्हावी, या उद्देशाने या कार्यक्रमाचे आयोजन करण्यात आले होते. विद्यार्थिनींनी विविध पारंपरिक खेळ, नृत्यप्रकार आणि गौरी गीतांचे सादरीकरण करत कार्यक्रमात रंगत आणली.

यावेळी काठवटकणा, निसरफुगडी, घोडाफुगडी, सूप नाचवणे, घागर घुमवणे, हडवळ घूम-पडवळ घूम आदी पारंपरिक प्रकार विद्यार्थिनींनी सादर केले. तसेच ‘तेलीन ताई ओ ग माई’, ‘पिंगा’, ‘सासुरवाशिन ग माहेरवाशिन’, ‘रुणझुणत्या पाखरा’ यांसह विविध गौरी गीतांनी वातावरण भक्तिमय आणि आनंदमय केले.

पारंपरिक वेशभूषेने खुलली सांस्कृतिक रंगत

नऊवारी साड्या, पारंपरिक दागिने आणि फुलांनी सजलेल्या विद्यार्थिनींच्या वेशभूषेमुळे कार्यक्रमाला विशेष आकर्षण प्राप्त झाले. झिम्मा-फुगडीच्या तालावर विद्यार्थिनींच्या उत्साहपूर्ण सहभागाने विद्यालयाचा परिसर अक्षरशः चैतन्यमय झाला. विद्यार्थिनींसोबत शिक्षिकांनीही पारंपरिक खेळ व नृत्यात सहभागी होत उत्साह वाढविला.

सौ. सुनीता पाटील, सौ. रोहिणी निकम, सौ. स्नेहा साळोखे, सौ. एल. आर. पाळेकर, सौ. राजवी साठे, सौ. सुजाता पाटील, श्रेया घोडके, सौ. मंगल कांबळे आदी शिक्षिकांनी कार्यक्रमात सहभाग घेतला.

लोकपरंपरेची ओळख करून देणारा उपक्रम

आजच्या आधुनिक आणि डिजिटल युगात पारंपरिक लोककला व खेळांशी नव्या पिढीचा संबंध कायम राहावा, यासाठी शैक्षणिक संस्थांमध्ये अशा उपक्रमांचे आयोजन महत्त्वाचे ठरते. झिम्मा-फुगडी, गौरी गीते आणि पारंपरिक वेशभूषेच्या माध्यमातून विद्यार्थिनींना महाराष्ट्राच्या सांस्कृतिक वारशाचा प्रत्यक्ष अनुभव मिळाला.

या उपक्रमातून विद्यार्थ्यांमध्ये सांस्कृतिक मूल्यांची जपणूक, लोकपरंपरेविषयी आत्मीयता आणि आपल्या मातीतल्या संस्कृतीचा अभिमान निर्माण होण्यास मदत झाली.

शिक्षक, विद्यार्थी मोठ्या संख्येने उपस्थित

यावेळी प्राचार्य मिलिंद पांगिरेकर, निवृत्त मुख्याध्यापक आर. वाय. देसाई, आर. पी. गव्हाणकर, पी. पी. भंडारी, युवराज शिगावकर, प्रा. शेखर देसाई, बी. के. इंगळे, राजेश गिलबिले, धीरज मेंगाणे, विद्याधर परीट, ऋषिकेश गव्हाणकर, शुभम कोकाटे, श्रेया घोडके, विजय स्मार्त, नामदेव शिंदे, विश्वास केणे यांच्यासह शिक्षक, विद्यार्थी व विद्यार्थिनी मोठ्या संख्येने उपस्थित होते.

परंपरा, संस्कृती आणि लोककलेचा सुंदर मिलाफ घडवून आणणाऱ्या या उपक्रमामुळे गारगोटी हायस्कूलमध्ये गणेशोत्सवाला एक वेगळीच सांस्कृतिक रंगत लाभली.